მესტია

მესტია ზღაპრულ სამყაროში გამოგზაურებთ, მაგიური სვანური კოშკებით, თოვლიანი მწვერვალებითა და ვიწრო, ქვაფენილიანი ქუჩებით. ის ასევე, იდეალური ადგილია თუ ხართ მთამსვლელი ან გიყვართ ლაშქრობა. ნებისმიერ სეზონზე, ის დაუვიწყარ შთაბეჭდილებებს დაგიტოვებთ. თუ გსურთ ამ უნიკალური ქალაქის შესახებ გაიგოთ მეტი, გაეცანით დეტალებს ქვემოთ.

რა ვნახოთ მესტიაში?

მესტია მრავალფეროვანი ადგილია და მოსანახულებელიც ბევრია. მესტიის მთავარი ღირსშესანიშნაობა სვანეთური კოშკებია, რომელიც თავისი უნიკალური ფორმებითა და არქიტექტურით ნებისმიერ მნახველში გაოცებას იწვევს.

არქიტექტურული და ისტორიული ძეგლების გარდა, მესტია გამოირჩევა სალაშქრო ბილიკების მრავალფეროვნებით. ასევე მთამსვლელებისთვისაც ის ერთ-ერთი საუკეთესო ადგილია, რადგან მწვერვალების სიმრავლე, მოყვარულ თუ პროფესიონალ მთამსვლელებს, ახალი თავგადასავლების უნიკალურ შესაძლებლობას აძლევს. თუ გსურთ ლაშქრობა ისეთ მწვერვალებზე, როგორიცაა უშბა და თეთნულდი, მაშინ მესტიას აუცილებლად უნდა ესტუმროთ.

მესტია ასევე მიმზიდველია მათთვის, ვისაც ზამთრის სპორტი და თხილამურებით სრიალი უყვართ. აქვე შეგიძლიათ მოინახულოთ უძველესი სამლოცველოები და სახლ-მუზეუმები, სადაც სვანეთის კულტურასა და ისტორიას უკეთ გაეცნობით. მათ შორის განსაკუთრებული პოპულარობით სარგებლობს მესტიის ისტორიულ-ეთნოგრაფიული მუზეუმი და მიხეილ ხერგიანის სახლ-მუზეუმი.

ჰაწვალი – თეთნულდის სათხილამურო კურორტები

ჰაწვალი ერთ-ერთი გამორჩეული სამთო კურორტია საქართველოში, რომელიც ზღვის დონიდან 2348 მეტრზე მდებარეობს. კურორტი მესტიასთან საბაგირო გზითაა დაკავშირებული. ჰაწვალი იდეალურია მათთვის, ვისაც გაუკვალავ თოვლში უყვარს სრიალი. მნიშვნელობა არ აქვს, ხართ პროფესიონალი თუ მოყვარული მოთხილამურე, ჰაწვალის სათხილამურო ტრასები მრავალფეროვანია და სხვადასხვა სირთულის დონეს მოიცავს. კურორტზე ჯამში 5 სათხილამურო ტრასაა. ამასთან, მოქმედებს 4 საბაგირო: ჰაწვალი, სლალომი, ბიგელი და ზურულდი.
ასეთივე გასაოცარი სამთო კურორტია თეთნულდი, რომელიც ზღვის დონიდან 2265 მეტრზე მდებარეობს. კურორტი მესტიიდან 15 კილომეტრითაა დაშორებული. თეთნულდი პროფესიონალი მოთხილამურეების ერთ-ერთი საყვარელი ადგილია, რადგან აქ ამიერკავკასიაში ყველაზე გრძელი და ყველაზე დიდი ვერტიკალური ვარდნის ტრასაა. ამასთან თეთნულდზე, 4 საბაგირო მოქმედებს.კურორტზე შეგიძლიათ ისიამოვნოთ თავისუფალი სრიალით, იფრინოთ პარაპლანით ან ისეირნოთ ცხენით.
ჰაწვალზე და თეთნულდზე სათხილამურო სეზონი დეკემბერში იხსნება, თუმცა ვიზიტორების დიდი ნაწილი კურორტებს იანვარი–თებერვლის პერიოდში სტუმრობს. კურორტებზე სათხილამურო სეზონი დაახლოებით აპრილამდე გრძელდება და ზუსტი დრო დამოკიდებულია, ამინდსა და თოვლის საფარის დონეზე.

10 საუკეთესო სალაშქრო ბილიკი მესტიიდან

მესტია იდეალური ადგილია არა მარტო ზამთრის სპორტის მოყვარულთათვის, არამედ მათთვისაც, ვისაც ზაფხულობით მთაში ლაშქრობა უყვარს. ქვემოთ წარმოგიდგენთ ტურისტებისთვის ყველაზე ცნობილ ბილიკებს, სადაც იდეალურად გაეცნობით სვანეთის რელიეფს და სუბალპურ ბუნებას.

1. მესტია-მაზერის ბილიკი – მისი სიგრძე 22 კმ-ზე მეტია და საფეხმავლო მარშრუტი 9 საათს მოიცავს. ეს, ერთ-ერთი ყველაზე რთული ბილიკია და გულის მთაზე ასვლასაც მოიცავს, რომელზე ასაწევი სიმაღლე 2060, ხოლო დასაწევი სიმაღლე 1380 მეტრია. ამიტომ ბილიკი რეკომენდებულია პროფესიონალი მოლაშქრეებისთვის.
2. მესტია–ჩხუთის ქედის ბილიკი – ბილიკის სიგრძე 23.2 კმ–ია და მარშრუტის ხანგრძლივობა 9 საათს შეადგენს. ბილიკის ერთ–ერთი დანიშნულების წერტილი სოფელი ლახირია. მარშრუტზე ასაწევი სიმაღლე 1910 მეტრია.
3. მესტია–ზურულდის ქედის ბილიკი – მარშრუტის გასავლელად 2 საათი დაგჭირდებათ. ბილიკის სიგრძე 6 კილომეტრია, ხოლო ასაწევი სიმაღლე 390 მეტრი. 
4. მესტია–წვირმის ბილიკი – ბილიკის საერთო სიგრძე 11.2 კილომეტრია და მის გასავლელად დაახლოებით 4 საათია საჭირო. ასაწევი სიმაღლე 390, ხოლო დასაწევი 898 მეტრია.
5. მესტია–მხერის ეკლესიის ბილიკი – მარშრუტის სიგრძე 17.2 კმ–ია და მის გასავლელად დაახლოებით 7 საათია საჭირო. ასაწევი სიმაღლე 1470 მეტრია.
6. მესტია–ჭალაათის მყინვარის ბილიკი – ბილიკის სიგრძე 16.4 კილომეტრია და მარშრუტის ხანგრძლივობა 7 საათია. ასვლის სიმაღლე კი 1560 მეტრი.
7. მესტია–ჟაბეშის ბილიკი – ამ მარშრუტის გასავლელად 5 საათია საჭირო და მისი სიგრძე 16 კილომეტრზე მეტია. ასაწევი სიმაღლე კი 911 მეტრია.
8. მესტია–ენგურის ველის ბილიკი – ამ მარშრუტისთვის 6 საათია საჭირო და მისი სიგრძე 18 კილომეტრია. ასაწევი სიმაღლე 1253 მეტრია, ხოლო ვარდნა 725 მეტრი.
9. მესტია–მესტიის ჯვრის ბილიკი – მანძილი 8 კილომეტრზე მეტია და მარშრუტის ხანგრძლივობა 4 საათია. მთლიანი ასვლის სიმაღლე 680 მეტრია, ხოლო დასაწევი სიმაღლე 240 მეტრი.
10. მესტია–ქორულდის ტბების ბილიკი – ამ მარშრუტის საერთო სიგრძე 16.4 კილომეტრია და გასავლელად 7 საათია საჭირო. საერთო ასვლის სიმაღლე კი 1560 მეტრია. 

გეოგრაფია და კლიმატი

მესტია სუბალპურ ზონაში მდებარეობს და რთული რელიეფით გამოირჩევა. ქალაქი კავკასიონის ქედის კალთებზეა განლაგებული და მას ესაზღვრება ათობით მყინვარი, მათ შორის საქართველოს უმაღლესი მწვერვალი – შხარა. ქალაქი ზღვის დონიდან 1500 მეტრის სიმაღლეზე მდებარეობს და მოიცავს რამდენიმე მდინარის სათავეს, მათ შორის ენგურს, ნენსკრას, და იაფარს.

მესტია ტურისტებისთვის მიმზიდველია, როგორც ზაფხულში, ასევე ზამთარში. ნოტიო ჰავასთან ერთად, წლიური საშუალო ტემპერატურა 6 ცელსიუსია. ზაფხული მშრალი და მზიანია. ამ პერიოდში ტემპერატურა 17 გრადუსს აღწევს. ზამთარში დამახასათებელია დიდთოვლობა, ნალექიანი ამინდები და დაბალი ტემპერატურა, საშუალოდ -10 C.