ბორჯომი

იგი 61,235 ჰექტარზეა გადაჭიმული. მშვენიერმა ბუნებამ, ჯანმრთელობისთვის სასარგებლო კლიმატმა და რაც მთავარია, მინერალურმა წყლებმა, ბორჯომი, ყოფილ საბჭოთა კავშირში, ერთ-ერთ ყველაზე პოპულარულ კურორტად აქცია.
თანამედროვე ბორჯომი დამსვენებლებს კომფორტულ სასტუმროებს, გასართობ პარკებს, სამკურნალო-გამაჯანსაღებელ აბაზანებსა და ეკო-ტურებს სთავაზობს.

რა ვნახოთ ბორჯომში?

ბორჯომის არქიტექტურა და კულტურული მემკვიდრეობის ძეგლები მეტად მრავალფეროვანია. ქალაქში ვხვდებით XIX-XX საუკუნის შენობებს, ქვის ფასადებსა და ხის აივნებს, აღმოსავლური ინტერიერისთვის დამახასიათებელ ნიშნებსა და ნეორენესანსის სტილში გადაწყვეტილ სასახლეებს.
ბორჯომის ულამაზეს ხეობაში ქალაქის ისტორიულ ციხეებსა და ქრისტიანულ ტაძრებს მოინახულებთ, გაუყვებით სალაშქრო ბილიკებს და ხეობის თვალუწვდენელი ხედებით დატკბებით.

ბალნეოლოგიური და კლიმატური კურორტი

ბორჯომის ბუნებრივი რესურსები, მინერალური და გოგირდოვანი წყაროები, მარადმწვანე წიწვოვანი ტყეები და ჰავა ქალაქის სამკურნალო ფაქტორებია.
ბორჯომის მთავარი სიმდიდრე ვულკანური წარმოშობის, თერმულ-მინერალური წყლებია. ბორჯომის წყალი გამოიყენება სხვადასხვა სამედიცინო დანიშნულებისა თუ სპეციალური გამაჯანსაღებელი პროცედურებისათვის. ისტორიული პარკის ტერიტორიაზე და მის შემოგარენში მოწყობილია სპეციალური წყაროები, საიდანაც წყალი ბუნებრივი გაზის, ნახშირბადის დიოქსიდის წნევის მეშვეობით ზედაპირზე თბილი სახით ამოდის.
პარკში გახსნილია გოგირდოვანი წყლის აუზები, რომელსაც სამკურნალოდ ან უბრალოდ განსატვირთად და დასასვენებლად სტუმრობენ. წყლის ტემპერატურა 38 გრადუსამდე აღწევს, ამიტომ მასში ბანაობა ზამთარშიც შეიძლება.
გვიან გაზაფხულზე ბორჯომში სტუმრობა საუკეთესოა იმუნიტეტის აღსადგენად. მაისის პირველ ნახევარში ფიჭვისა და ნაძვის ყვავილობა და დამტვერვა იწყება და მის ბოლომდე გრძელდება. წიწვოვანი ხეების ყვითელი მტვერი მთელი ქალაქის თავზე ვრცელდება. მტვერი სასარგებლოა გულ-სისხლძარღვთა და რესპირატორული სისტემებისათვის.

ისტორია

ბორჯომის ისტორია შუა საუკუნეებიდან იწყება. ამ პერიოდიდან შემორჩა ორი მნიშვნელოვანი ციხესიმაგრე, “გოგიასა” და “პეტრეს” ციხეები. ძველი ქართული ლეგენდის თანახმად, სიტყვა ბორჯომი ორი სიტყვისაგან – “ბორჯ”(მყარი კედელი) და “ომი” (ომი) შედგება. ხშირი ომიანობის დროს ბორჯომს მისი ხელსაყრელი მდებარეობა, ხეობაში ციხე-სიმაგრესავით იცავდა. ხეობის ფერდობებზე კი აშენებული იყო სათვალთვალო კოშკები.
XIX-XX საუკუნეებში ქალაქი რუსეთის სამეფო ოჯახის ფავორიტ ელიტურ კურორტად იქცა. ქალაქის გენერალური გეგმა მე-19 საუკუნის ბოლოს, პრინცი რომანოვის ბრძანებით შემუშავდა, რამაც შესაძლებელი გახადა ქალაქის ქაოტური განვითარების რეგულირება. ბორჯომი განსაკუთრებული პოპულარობით სარგებლობდა საბჭოთა კავშირის ქვეყნებში. XX საუკუნის მეორე ნახევარში ყოველწლიურად მისი 15 სანატორიუმი 80 000 ვიზიტორს მასპინძლობდა.