გურია

მიუხედავად მცირე ფართობისა, ამ მხარეში ერთდროულადაა გაერთიანებული სუბტროპიკული და ალპური ტყეები. შესაბამისად, ის ნებისმიერი ტიპის ვიზიტორისთვის საინტერესო ადგილია. გურულების ტრადიციები და მუსიკისადმი უნიკალური ნიჭი კი სრულიად განსხვავებულ სამყაროს ქმნის ტურისტებისთვის. გურულებს ძალიან უყვართ დღესასწაულები. შესაბამისად აქ გასართობიც ბევრია.

რა ვნახოთ გურიაში?

ერთი შეხედვით პატარა მხარე, ერთ–ერთი ყველაზე მრავალფეროვანი მხარეა საქართველოში. გურია ცნობილია სამკურნალო კურორტებით, რომლებსაც უნიკალური ჰავის გამო, ათასობით ტურისტი სტუმრობს. გურიის ზღვისპირა მხარე სუბტროპიკული ბუნებით გამოირჩევა.

გურიის ჩრდილოეთი ნაწილი, კი მთა–გორიანი და ალპურია. უნიკალური წყაროები, ნისლიანი კურორტები და უძველესი სამონასტრო კომპლექსები კი მოგზაურობას კიდევ უფრო დაუვიწყარს ხდის. გურიაში არა მარტო ისტორიული თუ ბუნების ძეგლების მონახულება შეგიძლიათ, არამედ ისეთი უნიკალურ დღესასწაულებზე დასწრება, როგორიცაა “დოღი,” “ლელო” და სხვა.

ისტორია

გურია ისტორიულ წყაროებში პირველად მე–8 საუკუნეში ჩნდება, თუმცა გურიაში გაკეთებული უძველესი აღმოჩენები ქვედა პალეოლოთის ხანას ეკუთვნის. სოფელ ანასეულში ნაპოვნი ნივთები მიუთითებს, რომ გურიაში მოსახლეობა ჯერ კიდევ ძვ.წ II ათასწლეულში ცხოვრობდა.

უძველესი საქართველოს ისტორიის მანძილზე, გურია ეგრისის სამეფოს შემადგენლობაში შედიოდა და ის აქტიურ სავაჭრო გზას წარმოადგენდა. ფეოდალურ პერიოდში, კი მხარეს გურიის საერისთავო ეწოდა, რომლის რეზიდენცია ლიხაურში მდებარეობდა. გურია აქტიურად ვაჭრობდა ვენეციასთან და გენუასთან. XV საუკუნეში, საქართველოს ერთიანი სამეფოს დაშლის შემდეგ, კი ის გურიის სამთავროს სახელით იხსენიება წყაროებში, რომლის ცენტრი ოზურგეთია.

საბჭოთა კავშირის მმართველობის პერიოდში, კი მხარეს ოზურგეთის მაზრა ეწოდებოდა. სწორედ ამ პერიოდში, ქობულეთის ტერიტორია გურიას ჩამოაცილეს, და მხარის ფართობი შემცირდა. აღსანიშნავია, რომ საბჭოთა პერიოდში, გურია გამოირჩეოდა აჯანყებების სიხშირითა და თავისუფლებისთვის ბრძოლით.

ტრადიცია და კულტურა

გურიის კულტურა ნებისმიერი ტიპის ადამიანს გააოცებს. აქ შეხვდებთ უნიკალურ ფოლკლორს, ტრადიციულ სპორტულ შეჯიბრებებს და შობის უძველეს ტრადიციულ მსველობას, “ალილოს.” ბახმაროში, ყოველწლიურად, ფერიცვალების დღესასწაულზე დოღი იმართება, სადაც ცხენოსნები საქართველოს ყველა კუთხიდან იღებენ მონაწილეობას.

ასევე ყოველწლიულად იმართება ლელოს თამაში, ლანჩხუთში, სადაც ორი სოფელი ერთმანეთს ეჯიბრება. ლელო ყოველწლიურად სხვადასხვა გარდაცვლილი ახალგაზრდა ადამიანის საპატივცემულოდ იმართება, რომლის საფლავზეც, გამარჯვებული გუნდი დადებს ლელოს და მიუძღვნის შესანდობარს.

გურიაში 7 იანვარიც უნიკალურია. გურული ჩიჩილაკით, ტკბილეულით გამართული ალილოს მსვლელობაში ძირითადად ბავშვები იღებენ მონაწილეობას. ასევე გამორჩეულია გურული სამზარეულო, ხაჭაპურითა და მთვარის ფორმის მქონე შობის ღვეზელით. Გურული ფოლკლორი, კი პოლიფონიის მწვერვალადაა მიჩნეული. ცნობილი “კრიმანჭული” და ტრადიციული ცეკვა “ფარცაკუკუ” კი გასაოცრად წარმოაჩენს გურულების კულტურასა და უნიკალურობას.

გეოგრაფია და კლიმატი

გურია დასავლეთ საქართველოში მდებარეობს და მას ესაზღვრება აჭარა, იმერეთი და სამცხე–ჯავახეთი. დასავლეთიდან კი ესაზღვრება შავი ზღვა. ადმინისტრაციულად, ის მოიცავს ოზურგეთის, ლანჩხუთისა და ჩოხატაურის მუნიციპალიტეტებს.

კლიმატი გურიაში სამკურნალო თვისებებით გამოირჩევა. ის საკმაოდ ტენიანია, თუმცა რელიეფიდან გამომდინარე, აერთიანებს როგორც ზღვის, ასევე მთის ჰავას და ჯანმრთელობისთვის დადებით მინერალებს შეიცავს. გურია მდიდარია მინერალური წყაროებითაც, რომელთაგანაც გამორჩეულია ნაბეღლავი.