უშგული
მათთვის, ვისაც მთაში დასვენება უყვარს, შხარას ძირას მდებარე უშგული, უნიკალური ადგილია. თოვლიან მწვერვალებს შორის მოქცეული თემური დასახლება, ყოველწლიურად აქტიურად იზიდავს, როგორც მოლაშქრეებს, ასევე მთამსვლელებს და ზამთრის სპორტის მოყვარულებს. პანორამულ ხედებს, თოვლიან მწვერვალებზე, სვანური კოშკები და უშგულის ულამაზესი ბუნება, კიდევ უფრო მეტ მაგიურობას ანიჭებს.
უშგულის შესახებ
უშგული სვანეთის ისტორიულ მხარეში, მესტიის მუნიციპალიტეტში მდებარეობს. ეს თემის ტიპის დასახლებაა, რომელიც აერთიანებს ხუთ სოფელს: ჩვიბიანს, მურყმელს, ლამჯურიშის, ჟიბიანს და ჩაჟაშს, რომელიც თემის ცენტრად ითვლება. აღსანიშნავია, ისიც რომ უშგულის ეს სოფელი იუნესკოს მსოფლიო მემკვიდრეობის ძეგლთა სიაშია შეტანილი.
უშგულის ღირსშესანიშნაობები
უშგულში შეხვდებით, როგორც უნიკალურ ისტორიულ თუ არქიტექტურულ, ასევე ბუნების ძეგლებს, რომელიც განსაკუთრებით მოლაშქრეებისთვის არის საინტერესო. მცირე თემურ დასახლებაში შეგიძლიათ მოინახულოთ, შუა საუკუნეების კოშკები, ეკლესიები და ამასთან დატკბეთ ხედებით, საქართველოს უმაღლეს მწვერვალზე.
-
ენგური
მდინარე ენგური კავკასიონის მთავარი წყალგამყოფი ქედიდან იღებს სათავეს და შავ ზღვაში ჩაედინება. მდინარის სიგრძე 213 კილომეტრია. მდინარეზე ამიერკავკასიის უდიდესი ჰიდროელექტოსადგური – ენგურჰესია აშენებული. წყალსაცავი რამდენიმე სადგურის კასკადს წარმოადგენს და ის, ეროვნული მნიშვნელობის კულტურის ძეგლთა სიაშია შეტანილი.
-
ლამარია და მამათა მონასტერი
ლამარია უშგულში მდებარე შუა საუკუნეების ღვთისმშობლის სახელობის ეკლესიაა. ბაზილიკის ტიპის ეკლესიას გარშემორტყმული აქვს გალავანი, რომლის დასავლეთ ნაწილში აგებულია სვანური კოშკი და მცირე დამხმარე შენობები. უშგულის ლამარიაში, ერთ-ერთი მთავარი ღირსშესანიშნაობა ეზოში დადგმული ქვის სკამია, რომელზეც გადმოცემის თანახმად უშგულის დაპყრობის მსურველი ფუთა დადეშქელიანი მოსახლეობამ მოკლა.
-
უღელტეხილი ზაგარო
ზაგაროს არა მარტო გეოგრაფიულად მნიშვნელოვანი ადგილი უკავია, როგორც ქვემო და ზემო სვანეთის დამაკავშირებელ გზას, არამედ წარმოადგენს ულამაზეს ბუნების ძეგლს, რომელიც ერთდროულად აერთიანებს მწვანე მდელოებსა და თოვლიანი მწვერვალების პანორამულ ხედებს.
-
უშგულის მუზეუმი
უშგულის ეთნოგრაფიული მუზეუმი იდეალური ადგილია, იმისთვის, რომ გაეცნოთ სვანეთისა და უშგულის უძველეს ისტორიას და გაიგოთ ბევრი საინტერესო დეტალი. მუზეუმი მეცამეტე საუკუნის საცხოვრებელ ნაგებობაში მდებარეობს და აერთიანებს სამეურნეო, საბრძოლო თუ საკულტო დანიშნულების ნივთებს. აქვე ნახავთ ტრადიციულ სვანურ ავეჯსა და ბევრ სხვა საინტერესო ნივთს.
-
თამარ მეფის ზამთრის ციხე-სიმაგრე
ლეგენდის თანახმად, თამარ მეფე უშგულს ხშირად სტუმრობდა და აქ ცხენებს აჩერებდა. ხშირი ვიზიტის მიზეზით, კი აიგო თამარის ზამთრის ციხე-სიმაგრე, რომელიც სამი კოშკისგან და გალავნისგან შედგება. მიუხედავად იმისა, რომ ძეგლი რესტავრაციას საჭიროებს, ნაგებობის დიდი ნაწილი შენარჩუნებულია.
-
უღელტეხილი ლატფარი
უშგულში, სვანეთის ქედზე მდებარე ლატფარის უღელტეხილის სიმაღლე 2830 მეტრია. ტერიტორია მდინარეების, ვალეეშის და ლამუშურისწყლის სათავეებს მოიცავს. უღელტეხილი აგებულია ქვიშაქვებით და მოლაშქრეების პოპულარულ დანიშნულებას წარმოადგენს. უღელტეხილზე, თოვლიანი მთის ხედებთან ერთად, ერთიანდება უნიკალური სუბალპური ფლორა.
სასტუმროები უშგულში
უშგულში შეგიძლიათ დაისვენოთ, როგორც საოჯახო ტიპის სასტუმროებში, ასევე შედარებით დიდ სასტუმროებში, რომლებიც სხვადასხვა დასასვენებელ სერვისებს გთავაზობთ.
შედარებით ბიუჯეტური მოგზაურობისთვის, ტურისტები ხშირად ირჩევენ ისეთი მცირე ზომის სასტუმროებს, როგორიცაა “Guesthouse Itin,” “Maxvshi,” “Lamjurishi,” “Guesthouse Solomon” და “Chvibiani Guesthouse & Bar.” თითოეულ სასტუმროში დაგხვდებათ, კეთილმოწყობილი ნომრები და გასაოცარი მთის ხედები, კავკასიონის მწვერვალებზე. ასევე ისიამოვნებთ სვანური სტუმართმოყვარეობით.
რაც შეეხება შედარებით ცნობილ სასტუმროებს, შეგიძლიათ ესტუმროთ “Hotel Panorama Ushguli-ს”, “სვანური სახლს” “Koshki–ს” “Nato–ს” “მშვიდობას” და “Old Tower Ushguli–ს.” კომფორტულ და დახვეწილ, სვანურ ტრადიცულ ინტერიერთან ერთად, შეგიძლიათ ისიამოვნოთ უგემრიელესი სვანური კერძებით და დაესწროთ სხვადასხვა გასართობ საღამოებს, რაც თქვენს დასვენებას უშგულში, კიდევ უფრო დაუვიწყარს გახდის.
რესტორნები უშგულში
უშგულში მეტ წილად მცირე ზომის რესტორნებია, სადაც შეძლებთ ქართული და სვანური ტრადიციული კერძების დაგემოვნებას. თითოეულ რესტორანში მყუდრო, ტრადიციულ მოტივებზე შექმნილი გარემო და ულამაზესი მთის ხედები დაგხვდებათ. ვიზიტორებში განსაკუთრებული პოპულარობით სარგებლობს “Cafe Koshki,” ‘Lemi” და “Shkhara Glacier Restaurant.” რესტორნები ასევე გარე სივრცეებსაც გთავაზობთ, გასაოცარი პანორამული ხედებით კავკასიონის მწვერვალებზე.
ხშირად დასმული კითხვები
როგორ მივიდეთ უშგულში?
თბილისიდან უშუალოდ უშგულის მიმართულებით არ ინიშნება მიკროავტობუსები. საუკეთესო გზა თბილისიდან მესტიის მიმართულებით, ხოლო შემდეგ, მესტიიდან უშგულის მიმართულებით მგზავრობაა. თბილისიდან უშგულამდე მანძილი 390 კილომეტრია. მესტიიდან უშგულამდე კი 47 კილომეტრი. საერთო ჯამში, მგზავრობისთვის დაახლოებით 8 საათი დაგჭირდებათ.
როდის არის საუკეთესო დრო უშგულის მოსანახულებლად?
უშგულში ტურისტული სეზონია ზაფხული, რადგან ამ დროს ამინდები ლაშქრობისთვის ხელსაყრელი და თბილია. შესაბამისად, უშგულში მოგზაურობისთვის საუკეთესო პერიოდი მაისი–სექტემბერია.