გონიო

გონიოს პლაჟი ორი ნაწილად იყოფა – ჩრდილოეთ სანაპირო “ველური პლაჟის” სახელითაა ცნობილი, ხოლო სამხრეთით კარგად განვითარებული ტურისტული ინფრასტრუქტურა და კეთილმოწყობილი სანაპიროებია.
გონიო საკუთარ ისტორიულ წარსულში გამოგზაურებთ თუკი მის მთავარ ღირსშესანიშნაობას, გონიოს ციხეს ეწვევით. ამ ციხეს სხვანაირად აფსაროსის სიმაგრესაც უწოდებენ. ციხის შესახებ ბევრ საინტერესო ფაქტსა და ლეგენდას უფრო დაწვრილებით ქვემოთ გაგაცნობთ.
გონიოდან 2 კილომეტრში კვარიათისა და სარფის მონახულებას შეძლებთ, სადაც მთა კიდევ უფრო უახლოვდება ზღვას. აქ გაშლილ პლაჟებთან ერთად ზღვაში შეჭრილ კლდოვანი ნაპირებსაც შეხვდებით.

რა ვნახოთ გონიოში?

გონიო დამსვენებლებს სამი მთავარი უპირატესობის გამო იზიდავს – მზიანი და მოწესრიგებული სანაპირო ზოლი, სუფთა, კამკამა წყალი და მთებთან სიახლოვე. ზღვაზე დასვენებისა და გართობის პარალელურად გონიოში და მის ირგვლივ მრავალფეროვან ტურისტულ სანახაობებს აღმოაჩენთ.

გონიოს ციხე

გონიოს, იგივე აფსაროსის ციხის ისტორია I საუკუნიდან იწყება და რომაელთა სახელს უკავშირდება. თუმცა თავად დასახლება გაცილებით ძველია. ციხე-სიმაგრე გონიოს შესასვლელიდან 3 კილომეტრში, გონიო-კვარიათის მთავარ გზაზე მდებარეობს.
გონიო-აფსაროსის ისტორიას არგონავტების მითსაც უკავშირებენ. ლეგენდის თანახმად, სწორედ აქ მოუკლავთ მედეასა და იასონს აიეტის ვაჟი, აფსირტე. აქედან მომდინარეობს ადგილისა და ციხის სახელწოდება.
ციხეს საკმაოდ სქელი ქვის კედლები აკრავს, ვინაიდან მას თავდაცვითი დანიშნულება ჰქონდა. გალავანი 18 კოშკისაგან შედგება. მათი სიმაღლე 7 მეტრს აღწევს. გალავნის კედლებში შესამჩნევია მშენებლობის რამდენიმე ფენა. მათ შორის უძველესია მართკუთხა, თლილი ქვების წყობა, რომელთა სიმაღლე 80სმ, სიგანე კი 70 სმ-ს აღწევს.
ამჟამად ციხის ტერიტორიაზე მოწყობილია მუზეუმი და ეკლესია, სადაც გათხრების შედეგად აღმოჩენილი უძველესი არტეფაქტებია დაცული.
გადმოცემის მიხედვით, ციხის ტერიტორიაზეა დასვენებული მატათა მოციქულის წმინდა ნაწილები. ამიტომ აქ მოციქულის სიმბოლურ საფლავს იხილავთ.
გონიოს ციხე ზღვიდან 800 მეტრითაა დაშორებული. არსებობს მოსაზრება, რომ ციხე ზღვასთან ბევრად ახლოს მდებარეობდა. სწორედ მის მიმდებარედ უერთდებოდა მდინარე ჭოროხი შავ ზღვას, რომელსაც სანაოსნოდაც იყენებდნენ. მოგვიანებით ჭოროხის ეს შესართავი მდინარეს გამოეყო და წარმოქმნა გონიოს ტბა.

გონიოს სანაპირო

გონიოს სანაპირო ერთ-ერთი საუკეთესოა შავი ზღვის სანაპიროებს შორის. ფართოდ გაშლილი პლაჟიდან თვალისმომჭრელი ხედი იშლება აჭარის ამწვანებულ მთებზე და მასზე შეფენილ სოფლებზე.
სანაპირო მუდმივად მოვლილი, სუფთა და კეთილმოწყობილია. გონიოს პლაჟი აღჭურვილია გამოსაცვლელი და საშხაპე კაბინებით. სანაპიროზე მზის საწოლებისა და ქოლგების დაქირავება შეგიძლიათ. წყლის ატრაქციონების მოყვარულთათვის აქ არის სკუტერები, წყლის ბანანი, ველოსიპედები და პარაშუტით ფრენა. სანაპიროს გასწვრივ მოწყობილია ბულვარი, სადაც შეგიძლიათ ისეირნოთ, ესტუმროთ ღია ბარებსა და კაფეებს, ბავშვებისთვის მოწყობილ გასართობ კუთხეებს, სანაყინეებსა და მრავალ სხვა გასართობს.
მზის ჩასვლის შემდეგ სანაპიროზე გონიოს ღამის ცხოვრება იწყება. სასტუმროებისა და კაფე-რესტორნების უმეტესობა სანაპირო ზოლთან ახლოს მდებარეობს. მუსიკის თანხლებით შეგიძლიათ გაერთოთ და ისიამოვნოთ გემრიელი კოქტეილებითა და ადგილობრივი სამზარეულოთი.