ციხისძირი

პეტრას ციხე

პეტრას ციხე-სიმაგრე ეგრისის სამეფოს ისტორიულ წარსულში გვამოგზაურებს. სახელი “პეტრა” მის ადგილმდებარეობას უკავშირდება, რაც ქვას, კლდეს ნიშნავს. ციხე-სიმაგრეს გალავნის გარდა კლდოვანი რელიეფი იცავდა, რაც მის თავდაცვისუნარიანობას უზრუნველყოფდა. სწორედ ამიტომ, პეტრა მიუვალ ციხედ ითვლებოდა.
ნაგებობა ციხისძირში, ზღვის პირას, კლდოვან ბორცვზე მდებარეობს და VI საუკუნით თარიღდება. კომპლექსი სამ ნაწილს მოიცავს – ციტადელს, გარექალაქსა და ნასახლარს. ციტადელში შემორჩენილია საცხოვრებელი და სხვა საყოფაცხოვრებო დანიშნულების ნაგებობების ნანგრევები.
ტურისტებს პეტრა მისი გამორჩეული მდებარეობის გამო იზიდავს. აქედან იშლება შავი ზღვისა და მისი სანაპირო ზოლის საუცხოო ხედი. მწვანით შემოსილი ციხისძირის ფერდობები და ლაჟვარდოვანი ზღვის ტონები. მზის ჩასვლისას კი ათასფრად აელვარებული ცის კაბადონი.
ვიზიტორებისთვის ციხე-სიმაგრის ტერიტორიაზე მოწყობილია არქეოლოგიურ-არქიტექტურული მუზეუმ-ნაკრძალი.

დამალული პლაჟები

ციხისძირში სამი მთავარი პლაჟია – უკიდურესი სამხრეთით, ჩრდილოეთითა და მათ შორის მოქცეული ბამბუკების ცნობილი სანაპიროთი. პლაჟები ერთმანეთს სარკინიგზო ლიანდაგის გასწვრივ არსებული საფეხმავლო ბილიკებით უკავშირდება.
ციხისძირის ბამბუკების პლაჟი ყველაზე ცნობილი და სანახაობრივია. ესაა კლდოვანი სანაპირო, შემოსაზღვრული ბანანის მცირე ზომის ბაღითა და ბამბუკის ხეებს შორის მიმავალი ლაბირინთებით. ზღვის პირას მოწყობილია ხის ნაგებობა, რომელზეც შეგიძლიათ დღის მანძილზე ინებივროთ და მზის აბაზანებით ისიამოვნოთ. საღამოობით აქაურობა პატარა ბარად გადაიქცევა, სადაც მუსიკის თანხლებით მრავალფეროვანი კოქტეილებით გაგიმასპინძლდებიან.
პლაჟზე მოხვედრა ყველაზე მარტივად რესტორან “შუქურადან” შეგიძლიათ. რესტორნამდე მისვლა მანქანით შეგიძლიათ, შემდეგ კი კიბეებით დაეშვებით სანაპიროსაკენ.
სამხრეთის პლაჟი სასტუმრო “კასტელო მარე”-დან ბუკნარამდეა გადაჭიმული. სანაპირო ქვიანია. თუკი გყავთ საკუთარი ავტომობილი, უმჯობესია ბუკნარამდე მანქანით გადაადგილდეთ, იქიდან კი მარტივად აღმოჩნდებით პლაჟზე.
ჩრდილოეთით მდებარე კლდოვან სანაპიროზე პეტრას ციხე-სიმაგრის მიმდებარე ტერიტორიიდან შეგიძლიათ მოხვდეთ. უკეთესი ნავიგაციისთვის უმჯობესია გამოიყენოთ რუკა, რადგან შესაძლოა აქაურმა ვიწრო და დაქსელილმა გზებმა დაგაბნიოთ.